काठमाडौँ। प्रहरीले चोरीका मोटरसाइकलको पार्टपुर्जा निकाली बिक्री तथा अन्य मोटरसाइकलमा जडान गर्ने कार्यमा संलग्न तीन जनालाई पक्राउ गरी सार्वजनिक गरेको छ ।

पक्राउ पर्नेमा मोरङ कानेपोखरी गाउँपालिका–६ घर भई काठमाडौँ बूढानीलकण्ठ नगरपालिका–७ हात्तिगौँडा बस्ने ३१ वर्षीय लक्ष्मण विश्वकर्मा, अर्घाखाँचीको शितगङ्गा गाउँपालिका–२ घर भई बूढानीलकण्ठ–६ हात्तिगौँडा बस्ने २८ वर्षीय नरबहादुर चित्रे र बुढानिलकण्ठ–७ हात्तिगौँडा बस्ने ३८ वर्षीय करण खड्गी रहेका जिल्ला प्रहरी परिसर काठमाडौँका प्रवक्ता एवं प्रहरी उपरीक्षक पवनकुमार भट्टराईले जानकारी दिए ।

उहाँले भन्नुभयो, “बुढानिलकण्ठ–७ हात्तिगौँडा र काठमाडौँ महानगरपालिका–२२ सङ्कटा मन्दिर नजिक पार्किङ गरी राखेको बाप ०२–०१६ प ६१४३ नम्बरको मोटरसाइकल चोरी गरी पाटपुर्जासमेत निकाली बिक्री वितरण तथा अन्य मोटरसाइकलमा जडान गरिएको भन्ने सूचनाको आधारमा प्रहरी प्रभाग बूढानीलकण्ठबाट खटिएको टोलीले निजहरूलाई पक्राउ गरेको हो ।” पक्राउ परेकाहरूमाथि थप आवश्यक अनुसन्धान भइरहेको प्रहरीले जनाएको छ ।

निजहरूको साथबाट दुई थान टायर, इञ्जिनको भाग, भाइजर, चेसिस नम्बर काटेको टुक्राहरू, साइलेन्सर, टेङ्की, सकको भाग, मोटरसाइकलको पाटपुर्जा निकाल्न प्रयोग हुने विभिन्न समान, उक्त चोरीका मोटरसाइकलको पाटपुर्जा निकाली जडान गरिएका तीन वटा मोटरसाइकल बरामद गरिएको प्रहरी उपरीक्षक भट्टराईले बताए ।

सितापाईलाबाट एक हजार किलो सुपारीसहित एक जना पक्राउ प्रहरीले काठमाडौँको सितापाईलाबाट एक हजार किलो सुपारीसहित एक जनालाई पक्राउ गरेको छ । पक्राउ पर्नेमा धादिङ घर भएका २२ वर्षीय रामशरण बिसुङ्खे रहेका जिल्ला प्रहरी परिसर काठमाडौँका प्रवक्ता एवं प्रहरी उपरीक्षक भट्टराईले राससलाई जानकारी दिए ।

उनले भने, “प्रहरी वृत्त स्वयम्भूबाट खटिएको टोलीले सुपारी लोड भएको बाप्र ०२–०२५ च ०३९७ नम्बरको गाडी र सो गाडी चालक बिसुङ्खेलाई पक्राउ गरेको हो ।” बरामद गरिएको सुपारीसहित निजलाई प्रहरीले विमानस्थल भन्सार कार्यालयमा पठाएको प्रवक्ता भट्टराईले बताए । लागुपदार्थ सेवन गरी सवारी चलाउने सात जना चालक पक्राउ ट्राफिक प्रहरीले लागुपदार्थ सेवन गरी सवारीसाधन चलाउने सात चालकलाई पक्राउ गरेको छ ।

काठमाडौँ उपत्यका ट्राफिक प्रहरी कार्यालयको टोलीले आज नागढुङ्गामा गरेको जाँचका क्रममा लागुपदार्थ सेवन गरी सवारीसाधन चलाउने तीन माइक्रो चालक, दुई बस चालक, एक ट्रक चालक र एक पिकअप भ्यान चालकलाई पक्राउ गरेको हो । ट्राफिक प्रहरीले नेपाल प्रहरी अस्पताल, लागुऔषध नियन्त्रण ब्यूरो र प्रहरी प्रभाग नागढुङ्गाको टोलीको सहयोगमा जाँच गरिएको थियो ।

पक्राउ परेका चालकहरूलाई थप अनुसन्धानका लागि प्रहरी वृत्त थानकोट पठाइएको कार्यालयका प्रमुख प्रहरी वरिष्ठ उपरीक्षक नवराज अधिकारीले जानकारी दिनुभयो । यात्रु बोक्ने जस्तो संवेदनशील सवारीसाधन चलाउने चालकले लागुपदार्थ सेवन गरी सवारीसाधन चलाउनु आफौमा नियम विपरीत तथा दण्डनीय कार्य भएको ट्राफिक प्रहरीले जनाएको छ ।

सवारीसाधन चलाउँदा चालकको मात्र नभई यात्रुको जीवनसमेत जोखिममा पर्ने हुनाले आफू सवार सवारीसाधनका चालकले लागुपदार्थ तथा मादकपदार्थ सेवन गरेको शङ्का लागेमा यात्रुले तत्काल नजिकैको प्रहरी कार्यालय, ट्राफिक कन्ट्रोल रूमको हटलाइन नम्बर १०३ र प्रहरीको हटलाइन नम्बर १०० मा खबर गर्न काठमाडौँ उपत्यका ट्राफिक प्रहरी कार्यालय अनुरोध गरेको छ ।