अमेरिका, इजरायल र इरानबीच जारी युद्धका कारण विश्वकै सबैभन्दा ठूलो प्रतियोगितामा विश्वकप फुटबलमा इरानकोे फुटबल टोलीको सहभागिता नजनाउने भएकाे छ ।

इरानका खेलकुद मन्त्री अहमद डोन्यामालीले संयुक्त राज्य अमेरिकाले इरानका सर्वोच्च नेता अयातोल्लाह अली खामेनीको हत्या गरेका कारण इरान फिफा विश्वकपमा भाग नलिन बताए ।

उनले बुधबार सरकारी टेलिभिजनलाई भने “यो भ्रष्ट शासन [अमेरिका] ले हाम्रा नेताको हत्या गरेको कुरालाई ध्यानमा राख्दै, कुनै पनि परिस्थितिमा हामी विश्वकपमा भाग लिन सक्दैनौं,”

आगामी फिफा विश्वकप यही वर्षको जूनमा अमेरिका, मेक्सिको र क्यानडामा संयुक्त रूपमा आयोजना हुन गइरहेको छ । जसमा, इरान पनि त्यस प्रतियोगितामा सहभागि टोली हो ।

इरानले विश्वकपमा पछिल्ला समयमा एसियाको प्रतिनिधित्व लगातार गरिरहेको छ । इरानले पछिल्लो समयमा लगातार तीन विश्वकपमा सहभागिता जनाइसकेको छ भने आगामी विश्वकप टोलीको लगालग चौथो सहभागिता पनि हो ।

यस विश्वकपमा इरानले समूह चरणका खेलहरू अमेरिकामै खेल्ने तालिका रहेको छ । एसियाबाट छनोट भएको इरानले समूहमा बेल्जियम, नेदरल्यान्ड्स र इजिप्टविरुद्ध खेल्नु पर्नेछ ।

इरानले नखेलेमा यसको विकल्प फिफाले कुनै टोलीलाई खेलाउनेछ । साथै प्रतियोगिताको संरचनामा पनि यसको व्यापक प्रभाव पर्न सक्नेछ ।

हालै पनि भारत र श्रीलंकामा भइरहेको टी २० विश्वकपबाट बंगलादेशले नाम फिर्ता लिँदा त्यस टोलीको स्थानमा स्कटल्यान्डले खेलेको थियो । तर, बंगलादेशको अनुपस्थितमा स्कटल्यान्डले राम्रो प्रदर्शन गर्न सकेन ।