काठमाडाैं । राष्ट्रिय स्वतन्त्र पार्टी (रास्वपा) ले नवनिर्वाचित प्रतिनिधिसभा सदस्यहरूका लागि दुई दिने विशेष अभिमुखीकरण कार्यक्रम आयोजना गर्ने भएको छ।

पार्टीले मंगलबार र बुधबार ललितपुरको होटल रोयल टुलिप, ग्वार्कोमा सांसदहरूको अभिमुखीकरण हुने जनाएकाे छ ।

प्रशिक्षणमा आउने सांसदहरूलाई रास्वपाले ६ बुँदे निर्देशन जारी गरेको छ।

पार्टीले हलभित्र मोबाइल फोन प्रयोगमा पूर्ण प्रतिबन्ध लगाएको छ। त्यसैगरी, कार्यक्रम अवधिभर सांसदहरूले परिवारका सदस्य, साथीभाइ वा अन्य कुनै पनि पाहुनालाई होटलमा आमन्त्रण गर्न पाउने छैनन्।

सांसदहरूका लागि पार्टीले नै खाना र आवासको व्यवस्था गर्ने भए पनि उनीहरूसँग आउने सवारी चालक वा सहयोगीहरूको व्यवस्थापन भने सांसद स्वयंले नै गर्नुपर्नेछ। चालकहरूको भोजन र आवासको व्यवस्था अन्य होटल वा स्थानमा गर्न पार्टीले आग्रह गरेको छ।