आज उत्तर इजरायलमा इरान र हिजबुल्लाहको यो ‘एकैसाथ आक्रमण’ गरेका छन् । यसलाइ जारी युद्धमा गम्भीर मोडको रूपमा देखिएको छ।

इजरायली सुरक्षा स्रोतका अनुसार, इरानले आफ्नो भूमिबाट ब्यालेस्टिक मिसाइलहरू प्रहार गरिरहेकै समयमा हिजबुल्लाहले लेबनानबाट साेही स्थानमा रकेट र ड्रोनहरूको वर्षा गराएको थियो।

यो दुईतर्फी आक्रमणको मुख्य उद्देश्य इजरायलको ‘आइरन डोम’ र ‘एरो’ रक्षा प्रणालीलाई अलमल्याउनु थियो।

हिजबुल्लाहले लेबनानबाट प्रहार गरेका रकेटहरूका कारण ग्यालिली क्षेत्रका बस्तीहरूमा लगातार साइरन बजेका थिए। केही रकेटहरू खुला क्षेत्रमा खसेको र केहीलाई इजरायली प्रणालीले आकाशमै नष्ट गरिदिएको छ।

इरानबाट आएका मिसाइलहरूका कारण कब्जा गरिएको गोलान हाइट्स क्षेत्रमा पनि खतराको संकेत दिइएको थियो।

इजरायली सेनाले अधिकांश इरानी मिसाइलहरूलाई बीचमै रोक्न सफल भएको दाबी गरेको छ। यद्यपि अखबारका अनुसार केही मिसाइल र रकेटहरू खुला जमिनमा खसेका छन्।