जनमत पार्टीले मधेस प्रदेश सरकारलाई दिएको समर्थन फिर्ता लिएसँगै फेरि मधेस सरकारमा नयाँ सरकार गठनको गृहकार्य सुरु भएको छ ।

जनमत पार्टीले प्रदेश सरकारप्रतिको आफ्नो समर्थन फिर्ता लिएको औपचारिक पत्र सोमबार प्रदेश प्रमुखको कार्यालयमा बुझाएको छ।  

प्रदेश सभामा १२ सदस्य रहेको जनमत पार्टी अहिले सरकारमा पनि सहभागी छ। उसले अर्थ र खेलकुद तथा समाज कल्याण मन्त्रालयसहित दुई महत्वपूर्ण मन्त्रालय सम्हालिरहेको छ।

जनपमत पार्टीका तर्फबाट महेश यादव अर्थमन्त्री र बसन्त कुशवाहा खेलकुद तथा समाज कल्याण मन्त्री छन्।

नयाँ राजनीतिक परिस्थिति विकास हुँदा नेपाली कांग्रेस र नेकपाबाहेकको एमाले, जसपा, जनमत र लोसपा सम्मिलित नयाँ सरकार बन्ने तयारी भइरहेको बताइएको छ ।

१०७ सदस्यीय मधेस प्रदेश सभामा हाल १ सय जना मात्रै सांसद छन्। एमालेका  २४, जसपाकाा १८, जनमतका १२ र लोसपाको ८ सांसदसहित ६२ जना सांसद नयाँ सरकार गठनको गृहकार्यमा लागेका छन्।