काठमाडौँ । चीन विरोधी गतिविधि गरिरहेको ‘राष्ट्रिय एकता अभियान’ नामक संस्थाबारे सुरक्षा निकायले अध्ययन अनुसन्धान गरिरहेका छन् । राष्ट्रिय अनुसन्धान विभाग, नेपाल प्रहरी र सशस्त्र प्रहरीले यो संस्था र संस्थाका नेतृत्वकर्ता विनयकुमार यादवको पिछा गरिरहेका हुन् ।

प्रहरी मुख्यालय नक्साल स्रोतका अनुसार बरा परवानीपुर स्थायी ठेगाना भएका यादवको नेतृत्वमा चिनियाँ राष्ट्रपति सि जिन पिङ र नेपालका लागि चिनियाँ राजदूत होउ याञ्छीका तस्बिर जलाउने गतिविधि तराईका विभिन्न स्थानमा भइरहेका छन् । काठमाडौँ उपत्यकामा पनि त्यस्ता गतिविधि गर्ने तयारी भइरहेको सूचनाका आधारमा प्रहरीले पिछा गरिरहेको प्रहरीका एक अधिकारीले जानकारी दिए ।

ती प्रहरी अधिकारी भन्छन्, ‘दक्षिणी छिमेकी मुलुकसँग नजिक रहेर चिनियाँ गतिविधि गरिरहेको भेटिएपछि हामीले पिछा गरिरहेका छौँ ।’ यादवसँगै संस्थामा मोरङका आरपी मैनाली र राजन अधिकारी, झापा गरामुनीका गजेन्द्र राजवंशी तथा सन्तोष पाठक सक्रिय रहेको पत्ता लगाउँदै प्रहरीले उनीविरुद्ध निगरानी गरिरहेको छ । उनीहरूले प्रयोग गर्ने मोबाइल नम्बर ट्रयाकमा लिएर अनुसन्धान गर्ने काम भइरहेको प्रहरी स्रोत बताउँछ ।

यादव र मैनाली यसअघि पनि विभिन्न चीन विरोधी गतिविधिमा संलग्न रहेको तथ्य आफूहरूले फेला पारेको प्रहरीले बताएको छ । प्रहरीका अनुसार यसअघि उनीहरू मधेस आन्दोलनका क्रममा राज्यको नीति विरोधी गतिविधिमा संलग्न भएको आरोपमा पक्राउ परेर छुटेका थिए ।

स्रोतका अनुसार प्रहरीले चीनमा अहिले विन्टर ओलम्पिक हुन लागेको र त्यसको विरोधमा चिनियाँ राजदूतावास अगाडि र अन्य चिनियाँ एजेन्सीहरूमा विरोध प्रदर्शन गर्ने तयारी भइरहेको सूचनाका आधारमा निगरानी राख्ने काम गरिरहेको छ । त्यसमा प्रहरी मात्रै होइन, सशस्त्र र अनुसन्धान विभाग पनि लागिरहेको स्रोतहरूले उल्लेख गरेका छन् ।