काठमाडौँ । अहिले देशमा पश्चिमी न्युन चापीय प्रणालीको प्रभाव रहेको छ । सोही कारण हाल देशभर सामान्यदेखि पूर्ण बदली भई धेरै स्थानमा वर्षा भइरहेको छ ।

मौसम पूर्वानुमान महाशाखाका अनुसार आज देशका प्रदेश १, मधेस प्रदेश, बागमती र गण्डकी प्रदेशमा आंशिकदेखि सामान्य बदली रही अन्य प्रदेशमा आंशिक बदली रहने छ । प्रदेश १, मधेस प्रदेश, बागमती र गण्डकी प्रदेशका थोरै स्थानमा तथा अन्य प्रदेशका पहाडी भूभागका एक दुई स्थानमा हल्का वर्षाको सम्भावना छ ।

देशका पूर्वी तथा मध्य भूभागका उच्च पहाडी तथा हिमाली भू भागका थोरै स्थानहरुमा हल्का हिमपातको सम्भावनासमेत छ । यस्तै, राति देशभर आंशिक बदलीदेखि मौसम सामान्यतया सफा रहने छ ।

महाशाखाले हिमपात र चिसोबाट बच्न सबैमा अनुरोध गरेको छ ।