काठमाडौँ । काठमाडौँ महानगरपालिकाले आजदेखि कोरोना भाइरस (कोभिड–१९) को दोस्रो खोप दिने भएको छ । महानगरले फाइजर खोपको दोस्रो मात्रा दिने भएको हो ।

जिल्ला खोप समन्वय समिति काठमाडौँको गत २० माघको निर्णयअनुसार महानगरपालिकाले फाइजरको दोस्रो मात्रा खोप लगाउने गरी सबै वडामा व्यवस्था गरेको छ ।

महानगरका स्वास्थ्य विभाग प्रमुख बलराम त्रिपाठीका अनुसार शनिबारबाहेक सबै दिन बिहान १० बजेदेखि ४ बजेसम्म खोप कार्यक्रम सञ्चालन गर्न लागिएको हो । खोप समन्वय समितिको निर्णयअनुसार वडाले तोकेका सम्बन्धित खोप केन्द्रमा लक्षित समूहमा १२ देखि १७ वर्ष उमेर समूहका पहिलो खोप लगाएको २१ दिन पूरा भएका बालबालिकाले मात्र सो खोप लगाउन पाउने छन् ।

पहिलो मात्रा खोप लगाएको खोप कार्डको साथमा नजिकको खोप केन्द्रमा जानु पर्ने महानगरले सूचना जारी गरेको छ ।