काठमाडौं । नेपाली कांग्रेसले अमेरिकी सहयोग परियोजना एमसिसी संसदबाट पारित गर्न अमेरिकी अधिकारीहरूले राखेको चासोलाई दबाब भन्न नमिल्ने बताएको छ। विहिवार अमेरिकी विदेश साहायक मन्त्री डोनाल्ड लुले नेपालका प्रमुख तीन दल कांग्रेस सभापति तथा प्रधानमन्त्री शेरवहादुर देउवा, एमाले अध्यक्ष केपी ओली र माओवादी केन्दका अध्यक्ष प्रचण्डलाई टेलिफोन गरी एमसीसी पारित नभए राम्रो नहुने र चीनका कारण पारित नभएको अर्थमा बुझने सम्मको चेतावनी दिएको थियो ।

त्यसपछि यो विषयमा अमेरिकाले दवाव दिएको भन्दै आलोचना हुन थालेपछि कांग्रेसले यसलाई दवावका रुपमा वुझनु नहुने बताएको हो ।
कांग्रेस प्रवक्ता डा प्रकशशरण महतले यसलाई स्वभाविक चासोका रुपमा लिनुपर्ने बताएको हो ।

शुक्रबार पार्टी कार्यालय सानेपामा बसेको केन्द्रीय कार्यसम्पादन समितिको बैठकपछि संवाददाताहरूसँग कुरा गर्दै कांग्रेस प्रवक्ता प्रकाशशरण महतले अमेरिकी सहायक विदेश मन्त्री डोनाल्ड लुले प्रधानमन्त्री एवं कांग्रेस सभापति शेरबहादुर देउवालाई फोन गरेको र त्यो स्वभाविक भएको बताए।

‘एमसिसीबाट हामीले प्राथमिकतामा राखेका पूर्वाधारमा सहयोग आउन लागेको हो। यसमा नेपालका सबै दलको सहभागिता छ। तपाईंहरूले नै छानेको परियोजना, तपाईंले नै पास गर्छौं भनी गरेको प्रतिवद्धता हो तर किन यसमा समस्या भइरहेको छ भनी उहाँहरूले सोध्नु स्वभाविक हो,’ प्रवक्ता महतले भने,‘यसलाई दबाब भन्न मिल्दैन। उहाँहरूले चासो राख्नु भएको हो।’

एमसिसी संसदबाट पारित गर्न कांग्रेसमा एकमत भएकाले अरू दलसँग छलफल गरेर प्रक्रिया अघि बढाउने महतले बताए।

कांग्रेस केन्द्रीय कार्यसम्पादन समितिको अब अर्को बैठक फागुन १ गते बस्नेछ। उक्त बैठकबाट पेस भएका विभिन्न प्रस्तावमा निर्णय हुने महतले जानकारी दिए।