काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ मधेस प्रदेश जाने भएका छन् । २७ औँ जनयुद्धको अवसरमा आयोजित प्रदेश स्तरीय कार्यक्रममा सहभागी हुन उनी मधेस प्रदेश जाने भएका हुन् ।

पार्टी कार्यलय पेरिस डाँडामा आयोजित कार्यक्रममा बोल्दै प्रचण्डले आफू मधेस प्रदेशको जनयुद्ध कार्यक्रममा सहभागी हुने बताए । यसपटक प्रदेश सरकारले तत्कालीन माओवादी केन्द्रले सशस्त्र युद्ध सुरु गरेको दिनको सम्झनामा जनयुद्ध दिवस मनाउने भएको हो ।

मधेस सरकारमा गत साउनदेखि नेकपा माओवादी केन्द्रसमेत सहभागी भएको छ । माओवादीको तर्फबाट सरकारमा सहभागी भएका आन्तरिक मामिला तथा संचार मन्त्री भरत साहको प्रस्तावमा प्रदेश सरकारले दिवस मनाउँदै सार्वजनिक बिदा दिएको छ ।

जनकपुरधामस्थित मधेश भवनको कभर्ड हलभित्र आयोजना हुने कार्यक्रमका प्रमुख अतिथिमा ‘प्रचण्ड’लाई निम्तो दिइएकाले उनी जाने भएका हुन् ।