काठमाडौँ । प्रधानन्यायधीश चोलेन्द्र शमशेर राणाको बहिर्गमनको माग गर्दै नेपाल बार एशोसियसनले गरेको आन्दोलन पुनः हुने भएको छ । कोभिड १९ महामारीका कारण देखाउँदै पछिल्लो समयमा ‘भर्चुअल’ माध्यमबाट आन्दोलन गर्दै आएको बारले आइतबारदेखि भौतिक रुपमा आन्दोलन गर्ने भएको हो ।

‘फागुन १ गतेबाट बिहान ११ बजेदेखि १२ बजेसम्म सर्वोच्च अदालत केन्द्रीत आन्दोलन कार्यक्रम भौतिक रुपमा निरन्तर जारी रहने’ महासचिव लिलामणि पौडेलले जानकारी दिए । उनका अनुसार गत २८ माघमा बसेको बार एशोसियसनको निर्णयअनुसार उक्त आन्दोलनको नयाँ कार्यक्रम मिति र स्वरुप तय गरिएको हो ।

विगत एक सय ७ दिनदेखि न्यायपालिकाको शुद्धिकरण र सुदृढीकरणका लागि न्यायधीश हरिकृष्ण कार्कीको संयोजकत्वको प्रतिवेदनको कार्यान्वयन र प्रधानन्यायधीश राणाको राजीनामा माग पूरा नभएसम्म आन्दोलन जारी रहने महासचिव पौडेलको भनाइ छ ।