काठमाडौं । राप्रपाबाट अलग भई राप्रपा नेपालको नेतृत्व लिएका कमल थापाले आफ्नो पक्षका नेता कार्यकर्तालाई आफूतिर तान्ने प्रयास थालेका छन् ।

राप्रपानिकट राष्ट्रिय प्रजातान्त्रिक महिला संगठन तथा राष्ट्रिय प्रजातान्त्रिक विद्यार्थी संगठन थापा नेतृत्वको राप्रपा नेपालमा समाहित भएको छ ।

संगठनका अध्यक्षसहित सिङ्गो कमिटी राप्रपा नेपालमा समाहित भएको दाबी गरिएको छ ।

महिला संगठनको केन्द्रीय कार्य समितिको बैठकबाट सिंगो संगठन राप्रपा परित्याग गरी राप्रपा नेपालमा समाहित हुने निर्णय गरेको संगठनकी अध्यक्ष ममता राईले बताइन् ।

यस्तै, राप्रपाको भ्रातृ संगठन राष्ट्रिय प्रजातान्त्रिक विद्यार्थी संगठनको कार्यबाहक अध्यक्ष शशी भण्डारीसहितको समूह पनि राप्रपा नेपालमा प्रवेश गरेको छ ।

यसअघि राप्रपा निकट पूर्वप्रहरी परिषद पनि थापा अध्यक्ष रहेको राप्रपा नेपालमा समाहित भएको थियो ।