काठमाडौं । जनता समाजवादी पार्टी (जसपा) संघीय परिषद् अध्यक्ष डा.बाबुराम भट्टराईले छद्म रुपमा नयाँ पार्टी निर्वाचन आयोगमा दर्ता गराएका छन् ।

पार्टीभित्र कार्यकारिणी अधिकारका विषयमा विवाद चुलिँदै जाँदा बाबुरामले अमुक पात्रलाई अघि सारेर निर्वाचन आयोगमा नयाँ पार्टी दर्ता गराएको स्रोतको भनाई छ । जसपा अध्यक्ष उपेन्द्र यादव एकलौटी ढंगले अघि बढिरहेको भन्दै पार्टीभित्र असन्तुष्टी बढेको हो ।

निर्वाचन आयोगले आसन्न निर्वाचनका लागि निश्चित समय तोकर दल दर्ता आह्वान गरेपछि ‘समावेशी लोकतान्त्रिक पार्टी’ निर्वाचन आयोगमा दर्ता गरिएको हो ।

डा. भट्टराई पत्नी हिसिला यमीले सो पार्टी दर्ता गराउने तयारी भए पनि दीपक लामिछानेको नामबाट पार्टी दर्ता गरिएको छ । जसको चुनाव चिन्ह आँखा रहेको छ ।

यसअघि डा. भट्टराईले तत्कालिन माओवादी परित्याग गरी नयाँ शक्ति नामको वैकल्पिक पार्टी दर्ता गर्दा पनि चुनाव चिन्ह पनि आँखा राखेका थिए ।

गत फागुन ३ गते जसपाको फुटको संघारमा रहेकाबेला हिसिया यमीले नयाँ पार्टी दर्ता गराउँदै भन्ने समाचार प्रकाशित भएको थियो ।

निर्वाचन आयोगले तोकेको समयसीमाभित्र पार्टी दर्ता नभएमा कथंकदाचित जसपाबाट अलग हुने अवस्थाका लागि सुरक्षित रहन नयाँ पार्टी दर्ता गरिएको स्रोतले बताएको छ ।

अमेरिकी समयोग परियोजना एमसीसीकाबारेमा पनि जसपाभित्र मतैक्यता रहेको देखिदैन । डा.भट्टराईले एमसीसीको अहिलेकै सम्झौता हुबहु पास गर्नुपर्ने भन्दै सामाजिक सञ्जालदेखि सबैतिर भन्दै आएका छन् ।

जसपा अध्यक्ष उपेन्द्र यादवले भने यसबारेमा सार्वजनिक रुपमा अभिब्यक्ति दिएका छैनन् । एमसीसीविरुद्ध सडकमा जनमत बढिरहँदा पनि भट्टराईले एमसीसी पास गर्न ढिला गर्न नहुने भन्दै रटान लगाइरहेका छन् ।