काठमाडौँ । पोखरामा गत आइतबार परेको भीषण असिना पानीले ११ करोड रुपैयाँ बराबरको क्षति भएको पोखरा महानगरपालिका कृषि तथा पशु विकास महाशाखाले जनाएको छ । बाक्लो असिना पानीका कारण केही जनावर मरेका छन् भने तरकारी तथा फलफूल नष्ट भएको हो ।

पोखरा महानगरपालिकाका कृषि महाशाखाका प्रमुख मनोहर कडारियाले पोखरा वडा नम्बर ९, ११, १३ र १८ मा धेरै क्षति भएको र अन्य वडामा सामान्य क्षति भएको बताए । उनले राज्यले कृषकलाई दिएको बिमा सुविधासमेत कृषकले सदुपयोग गरेमा यसप्रकारका क्षतिबाट राहत पुग्नसक्ने बताए ।

उनले असिनाका कारण सो वडामा तरकारी बाली, नगदे बाली, फलफूल, तोरी, आलुलगायत बालीमा पूर्ण क्षति पुगेको जानकारी दिए । उनका अनुसार असिना पानी परेको दोस्रो दिनसम्म असिना पग्लिएको छैन ।

पोखरा महानगरका कूल ३३ वडामध्ये दुई हजार १८१ हेक्टर क्षेत्रफलमा तरकारी खेती हुने गरेको छ । फलफूल तीन सय २० हेक्टर क्षेत्रफलमा, आलु एक हजार २५३ हेक्टर क्षेत्रफलमा उत्पादन हुने गरेको छ । असिनापानीले पोखराको सडक केही समय अवरुद्ध भएको थियो ।