काठमाडौँ । काठमाडौँ उपत्यकामा हुने सम्भावित आन्दोलन तथा प्रदर्शनलाई ध्यान दिँदै आज करिब चार हजार प्रहरी परिचालन हुने भएको छ । आज दिउँसो १ बजे बस्ने प्रतिनिधिसभाको बैठकमा अमेरिकी सहयोग परियोजना मिलिनियम च्यालेञ्ज कर्पोरेशन (एमसीसी)माथि छलफल हुने भएसँगै सुरक्षा व्यवस्था कडा बनाइएको हो ।

यसअघि प्रतिनिधिसभा बैठक बस्ने दिनहरूमा काठमाडौँमा चर्को आन्दोलन हुँदै आएको छ । संसदबाट एमसीसी अनुमोदन हुने भएसँगै भएको प्रदर्शनलाई मध्यनजर गर्दै सुरक्षा व्यवस्था कडा बनाइएको हो ।

आज नयाँबानेश्वर क्षेत्रमा एसपी दिनेश मैनालीको नेतृत्वमा दुई हजार ३५३ जना नेपाल प्रहरी खटिएका छन् । यस्तै, सशस्त्र प्रहरीका एसपी नरेन्द्र सेनको नेतृत्वमा एक हजार ५६४ जना सशस्त्र प्रहरी खटिएका छन् ।

यस्तै, काठमाडौँबाहेक धादिङ, काभ्रे, सिन्धुपाल्चोकलगायतका जिल्लाबाट प्रहरी काठमाडौँ ल्याइएको छ ।