काठमाडौं । प्रतिनिधिसभा बैठकमा एमसीसी सम्झौताबारे छलफल सुरु हुँदै गर्दा संसद भवन अगाडि आइतबार प्रहरी र प्रदर्शनकारीबीच झडप भएको छ ।

एमसीसीविरुद्धमा आन्दोलनमा उत्रिएका प्रदर्शनकारीले ठूलो संख्यामा तैनाथ प्रहरीमाथि ढुंगा र इँटा बर्साएपछि प्रहरीले आन्दोलनकारीमाथि हस्तक्षेप गरेको हो ।

प्रदर्शनकारीलाई रोक्न प्रहरीले पानीको फोहोरा फाल्नुका साथै दर्जनौं सेल अश्रुग्यास प्रहार गरेको छ । प्रहरीले बल प्रयोग गरी आन्दालनकारीलाई तितरबितर पारेको छ ।

आन्दोलनकारीहरुले विजुली बजार, बुद्धनगर आसपासका सडकभित्रको गल्लीगल्लीबाट प्रहरीमाथि ढुंगा बर्साइरहेका छन् ।

विप्लव नेतृत्वको नेकपा, मोहन वैद्य नेतृत्वको नेकपा क्रान्तिकारी माओवादी सहित ६ दल तथा राप्रपा र अन्य एमसीसीविरोधी समूहहरुले प्रदर्शन गरिरहँदा प्रहरीले हस्तक्षेप गरेको हो ।