काठमाडौं । बलात्कार आरोपित अभिनेता पल शाह (पूर्ण विक्रम शाह) लाई ७ दिन हिरासतमा राखेर अनुसन्धान गर्न अदालतले अनुमति दिएको छ ।

१७ वर्षीय नाबालिग बलात्कारको उजुरी परेपछि फरार रहेका पलले आइतबार जिल्ला प्रहरी कार्यालय तनहुँ पुगेर आत्मसमर्पण गरेका थिए । जिल्ला प्रहरी कार्यालय तनहुँमा नै किटानी जाहेरी परेकाले उनले तनहुँ प्रहरी पुगेर आत्मसमर्पण गरेका हुन् ।
शाह प्रहरी कार्यालय पुग्नु अघि नै सामाजिक सञ्जालमा फेसबुक स्टाटस राख्दै आज आफै प्रहरी कार्यालय पुग्ने बताएका थिए ।
प्रहरी नियन्त्रणमा पुगेपछि प्रहरीले पललाई जिल्ला अदालत तनहुँ लगेर अनुन्धानका लागि समय लिएको हो ।
अदालतबाट अनुसन्धानका लागि समय लिएपछि अनुसन्धान अघि बढाएको तनहुँ प्रहरी प्रवक्ता डिएसपी युवराज खड्काले जानकारी दिए ।

अभिनेता पल शाहले विगत डेढ वर्षयता नाबालिग गायिकालाई पटक÷पटक बलात्कार गरेको भन्दै गत बुधबार जिल्ला प्रहरी कार्यालय तनहुँमा उजुरी परेको थियो ।
आइतबार नै पलविरूद्ध नवलपुर प्रहरीमा पनि बलात्कारको उजुरी परेको छ ।