काठमाडौं । राष्ट्रिय जनमोर्चाले पाँचदलीय गठबन्धनबाट अलग भएको घोषणा गरेको छ ।

संसदमा सरकारले ल्याएको एमसीसी प्रस्ताव विरुद्धमा उत्रिएको जनमोर्चाले आज औपचारिक निर्णय गरी सत्ता गठबन्धनबाट अलग भएको घोषणा गरेको हो ।

जनमोर्चाको सोमवार बसेको केन्द्रीय सचिवालयको बैठकले गठबन्धनबाट अलग हुने निर्णय गरेको हो ।

‘हाम्रो पार्टी बाहेकका चार पार्टीले एमसीसीलाई संसद्द्वारा पारित गराउन गरेको षड्यन्त्र, जालझेल, तिकडम र साम्राज्यवादीहरूको दलाली तथा पृष्ठपोषण गर्ने काम गरेको हुनाले पाँच दलीय गठबन्धन देशको राष्ट्रियता, सार्वभौमसत्ता र अखण्डताकोविरुद्ध खडा भएको स्थितिमा पाँच दलीय गठबन्धनलाई कायम राखिरहनु पर्ने औचित्य समाप्त भएको छ ।’– जनमोर्चाका अध्यक्ष चित्रबहादुर केसीद्वारा जारी विज्ञप्तिमा भनिएको छ ।

पाँच दलीय सत्ता गठबन्धनबाट अलग भएको घोषणा गरेको राष्ट्रिय जनमोर्चाले अन्य संसद बाहिरका कम्युनिस्ट पार्टीहरुसँग गठबन्धन गरेर सडक आन्दोलन गर्दै आएको छ ।

६ कम्युनिस्ट पार्टी र दुई मोर्चाको आजको नेपाल बन्दमा पनि जनमोर्चा सहभागी छ ।