काठमाडौं । युक्रेन र रुसबीच भएको युद्धको असर नेपालमा पनि परेको छ । युद्धका कारण खानेतेल लगायतका दैनिक उपभोग्य वस्तुको भाउ आकाशिएको छ ।
नेपालीको भान्सामा अत्याधिक प्रयोग हुने सन फ्लावर (सूर्यमुखी) तेल र सोयाबिन तेलको भाउ एक साता यता बढ्दै गएको छ ।

अन्तर्राष्ट्रिय बजारमा तेलका लागि आवश्यक पर्ने कच्चा पदार्थको मूल्य बढेको कारण पनि तेल उद्योगीले मूल्य बढाएका हुन् । नेपालमा पाइने सूर्यमुखी तेलको कच्चा पदार्थ युक्रेनबाट भारत आउने गर्दथ्यो । त्यही कारण भारतमा पनि तेलको मूल्य बढेको छ ।

सन फ्लावर तेल प्रतिलिटर २ सय ४० मा खुद्रा विक्री हुँदै आएकोमा हाल २ सय ८० रुपैयाँसम्म पुगेको छ भने सोयाबिन तेल प्रतिलिटर २ सय ३० मा विक्री गर्दै आएकोमा २ सय ७० रुपैयाँसम्म पुगेको ब्यवसायीहरुले बताएका छन् ।

खाने तेलको कच्चा पदार्थका आपुर्तीमा अवरोध हुँदा अभाव भएकोले मूल्य बढेको नेपाल खुद्रा व्यापार संघका पूर्वअध्यक्ष पवित्रकुमार बज्रचार्यले बताए ।