काठमाडौँ । सहरी विकास मन्त्री रामकुमारी झाँक्रीले एउटै निर्माण व्यवसायीले बढीमा पाँच वटा आयोजना मात्र लिन पाउने बताएकी छन् । नेपाल निर्माण व्यवसायी महासंघको २३ औँ साधारण सभा तथा १२ औँ अधिवेशनमा सम्बोधन गर्दै उनले यस्तो बताएकी हुन् ।

यस्तै, उनले निर्माण व्यवसायीहरूले सरकारको नियन्त्रणभन्दा बाहिरको माग राखेर ‘होली डे’ मनाउन नहुने बताइन । ‘आजको महंगी हाम्रो नियन्त्रणमा छैन, भारतीय मुद्राको अवमूल्यन हुँदा डलरको मूल्य बढ्दा हाम्रो अर्थतन्त्रमा चाप परेको छ, सरकारको नियन्त्रणमा सबै कुरा रहेको छैन,’ उनले भनिन्, ‘सरकारको नियन्त्रणमा नरहेको कुरा तपाईहरूले दाबी गर्ने होइन, सहकार्य गरेर काम गर्ने हो ।’

उनले सरकारले निर्माण व्यवसायीका लागि धेरै सहयोगी काम गरेको बताइन् । उनले आगामी दिनमा निर्माण व्यवसायीले आफ्नो जिम्मेवारी पूरा गरी काम गर्नु पर्ने बताएकी थिइन् ।