ताजा जनादेशको विकल्प छैनः कमल थापा

मेरोन्यूज २०७८ फागुन २७ गते २०:०८

राप्रपा नेपालका अध्यक्ष एवं पूर्व उपप्रधानमन्त्री कमल थापाले देशलाई संकटबाट मुक्त गर्न ताजा जनादेशको विकल्प नरहेको बताएका छन् ।

शुक्रवार काठमाडौंमा आयोजित कार्यक्रममा बोल्दै अध्यक्ष थापाले देशलाई संंकटबाट मुक्त गर्न ताजा जनादेशको विकल्प नरहेको दाबी गरेका हुन् ।

उनले देशमा भ्रष्टाचार अत्यन्त विकराल अवस्थामा पुगेको भन्दै भ्रष्टाचार नियन्त्रण गर्ने संस्थाहरु राजनैतिक दलहरुको दबाब र प्रभावमा परेर निष्प्रभावी बनेको आरोप लगाए ।

उनले नेपालको राष्ट्रिय राजनीति संकटको चक्रव्यूहमा फसेको बताउँदै सरकार प्रभावहीन बनेको बताए ।

अध्यक्ष थापाले आगामी स्थानीय तहको निर्वाचनमा राप्रपा नेपाल सहभागी बन्ने र राप्रपा नेपालको प्राथमिकता स्थानीय निर्वाचन नभइ संसदीय निर्वाचन भएको बताए ।

आगामी निर्वाचनबाट पार्टीलाई राष्ट्रिय पार्टी बनाउने उनको दाबी छ ।