काठमाडौँ । बढ्दो कोरोना भाइरस संक्रमण दरका कारण सामूहिक परीक्षणमा फर्किरहँदा चीनमा मंगलबार करिब तीन करोड जनसंख्या भएको क्षेत्र लकडाउनमा छन् । मंगलबार मात्र पाँच हजार २८० जना कोभिडका नयाँ संक्रमित भेटिएका थिए ।

यो सोमबारको तुलनामा दोब्बर संख्या हो । उच्च संक्रमित ओमिक्रोन भेरियन्ट देशव्यापी फैलिएसँगै यसले चीनको शून्य कोभिड रणनीतिलाई बाधा गरेको छ ।सोही नीतिका कारण चीन दुई वर्ष बाहिरी संसारबाट नितान्तै अलग बनेको थियो ।

मंगलबार चीनका कम्तीमा १३ सहरमा पूर्ण रुपमा लकडाउन गरिएको छ । अरु धेरै सहरमा आंशिक लकडाउन घोषणा गरिएको छ । कोभिडबाट उत्तरपूर्वी प्रान्त जिलिन सबैभन्दा बढी प्रभावित छ । मंगलबार यहाँ तीन हजार नयाँ संक्रमित फेला परेको नेसनल हेल्थ कमिसनले जनाएको छ ।

त्यस्तै, ९० लाख जनसंख्या भएको भएको प्रान्तीय राजधानी चाङचुनका बासिन्दालाई घरमै बस्न भनिएको छ । एक करोड ७५ लाख मानिसको बसोबास रहेको दक्षिणी टेक हब सेनजेन तीन दिनदेखि लकडाउनमा छ । धेरै उद्योग बन्द छन भने सुपरमार्केट दराज खाली देखिन्छन् ।

उता, चीनकै ठूलो सहर सांघाई विभिन्न प्रतिबन्धको जालोमा झेलिएको छ । बाँकी विश्वको धेरैजसो ठाउँमा सहज भइरहेका बेला बन्द छिमेकका दृश्य, डर लाग्दो किनमेल र पुलिस घेराले चीन फेरि माहामारीको प्रारम्भिक चरणमा फर्किएको झल्को दिएको छ ।