काठमाडौं । नेकपा (माओवादी केन्द्र) लुम्बिनी प्रदेश समितिको प्रथम पूर्ण बैठकले लुम्बिनी प्रदेशको पदाधिकारी चयन गरेको छ । प्रदेश सम्मेलन सकिएको ४ महिनापछि माओवादीकाके लुम्बिनी प्रदेशले पदाधिकारी पाएको हो ।

लुम्बिनी प्रदेशको अध्यक्षमा सुदर्शन बराल मगर, ती जना उपाध्यक्षमा दुर्गा थारु कबिर, लुमाकान्त न्यौपाने (सागर) र वीर बहादुर खत्री चयन भएका छन् ।

त्यस्तै, सचिवमा कृष्ण अधिकारी (प्रकाश) र तीन जना सहसचिवमा अक्कल बहादुर बम, काशीराम यादव र पार्बती बिक तथा कोषाध्यक्षमा निर्दोष अलि चयन भएका छन् ।

दाङको भालुबाङमा मंसिर २५ र २६ मा सम्पन्न पहिलो प्रदेश अधिवेशनले २ सय १७ सदस्यीय समिति चयन गरेको थियो ।
माओवादी नेता कृष्णबहादुर महरा र वर्षमान पुनको प्रस्तावमा गुल्मीका बराल सर्वसम्मत अध्यक्ष बनेका हुन् ।

प्रदेश अध्यक्षमा रोल्पाका दीपेन्द्र पुन र दाङका होमराज शर्माले पनि दावी गर्दै आएका थिए । तर उनीहरु दुवै जना २ सय १७ सदस्यीय प्रदेश समितिमै नपरेपछि बराल सर्वसम्मत भएका हुन् ।

बराल लुम्बिनी प्रदेशको पूर्व सामाजिक विकास मन्त्री हुन् ।