काठमाडौँ । नेपाल आयल निगमले पेट्रोलियम पदार्थको मूल्य पुनः बढाउने भएको छ । इण्डियन आयल कर्पोरेशन (आइओसी)ले नेपाल आयल निगमलाई पेट्रोलियम पदार्थको नयाँ मूल्य सूची पठाएसँगै मूल्य वृद्धि हुने भएको हो ।

निगमले बुधबार राति १२ बजेदेखि लागू हुने गरी पेट्रोल र डिजेलमा पाँच रुपैयाँ मूल्य वृद्धि गर्ने भएको हो । निगमका अनुसार अन्य पेट्रोलिय पदार्थको मूल्य यथावत हुने भएको छ ।

योसँगै अब अब पेट्रोलको मूल्य प्रतिलिटर पाँच रुपैयाँले बढेर १५५ रुपैयाँ कायम हुने भएको छ । यस्तै, डिजेलमा प्रतिलिटर पाँच रुपैयाँले नै बढेर १३८ रुपैयाँ कामय हुने भएको छ ।

आइओसीबाट प्राप्त मूल्यमा सरकारले लगाएको कर थपिँदा पेट्रोलको खरिद मूल्य प्रतिलिटर १८२ रुपैयाँ ८१ पैसा, डिजेल प्रतिलिटर १६९ रुपैयाँ ४४ पैसा, मट्टितेल प्रतिलिटर ११३ रुपैयाँ ४९ पैसा, हवाई इन्धन (आन्तरिक) प्रतिलिटर १३१ रुपैयाँ ९४ पैसा, हवाई इन्धन (अन्तर्राष्ट्रिय) प्रतिलिटर ११४ रुपैयाँ ५१ पैसा र एलपी ग्यास प्रतिसिलिण्डर दुई हजार २४० रुपैयाँ ३४ पैसा पुगेको निगमले जनाएको छ ।

पेट्रोलियम पदार्थको बिक्रीबाट चैत महिनामा मात्रै १० अर्ब ६१ करोड नोक्सानी हुने निगमको प्रक्षेपण छ । निमगलाई मार्च १६ देखि ३१ सम्म पेट्रोलियम बिक्रीबाट पाँच अर्ब ३० करोड ९८ लाख घाटा हुने बताइएको छ ।