काठमाडौँ । महोत्तरीको औरही नगरपालिका १ बाट प्रहरीले स्रोत नखुलेको रकमसहित दुई जनालाई पक्राउ गरेको छ ।

महोत्तरी प्रहरीले आज बर्दिबास–जलेश्वर सडक खण्डमा ज ९ प ८२४७ नं. को मोटरसाइकलाई जाँच गर्ने क्रममा स्रोत नखुलेको ५५ लाख रुपैयाँ बरामद गरेको हो ।

महोत्तरीका प्रहरी प्रमुख एसपी कृष्ण पंगेनीले रकमसहित औरही २ का २१ वर्षीय धिरज कुमार यादव र १८ वर्षीय रमेश कुमार सहनी पक्राउ परेको बताए ।

यादवले भिरेको कालो रंगको कपडाको झोलाभित्र लुकाएको रकम भेटिएको हो । उनीहरूलाई थप अनुसन्धानका लागि भन्सार कार्यालय जलेश्वरमा पठाइएको प्रहरीले जनाएको छ ।