काठमाडौँ । जिल्ला प्रहरी कार्यालय सर्लाहीका एसपी कृष्ण प्रसाईलाई ६ महिनामै प्रहरी प्रधान कार्यालय तानिएको छ । जनता समाजवादी पार्टी (जसपा)का सचेतक प्रमोद शाहसँगको विवादलाई लिएर उनलाई प्रहरी प्रधान कार्यालय तानिएको हो ।

प्रदेश २ मै कार्यरत रहेका बेला प्रसाईलाई जिल्ला प्रहरी कार्यालय सर्लाहीको जिम्मेवारी दिइएको थियो । सशस्त्र प्रहरीका एसपी भरत खनियासँग मिलेर छोटी भन्सार नाका खुला गरेको आरोप लाग्दै आएको भए पनि प्रहरी प्रधान कार्यालय मौन रहेको थियो ।

तर, अहिले सांसद शाहसँगको विवादका कारण कार्यसम्पादनमा कमजोर ठहर गर्दै प्रसाईलाई सर्लाहीको इन्चार्जबाट हटाइएको हो । प्रहरी महानिरीक्षक शैलेश थापा क्षेत्रीले सर्लाहीमा एसपी प्रवीण पोखरेललाई पठाएका छन् ।

पोखरेल प्रहरी प्रधान कार्यालयको अन्वेषण योजना तथा विकास निर्देशनालयमा कार्यरत थिए । २०७८ मंसिर ५ देखि सर्लाहीको कमाण्ड समालेका प्रसाईलाई प्रहरी प्रधान कार्यालयको अन्वेषण योजना तथा विकास निर्देशनालयमा काज सरुवा गरेको छ ।

सामान्यतया एक वर्षसम्म कार्यालय प्रमुखको सरुवा गर्ने परम्परा छैन । कुनै कारणवश सरुवा गर्नु पर्ने भए पनि यथोचित कारण आवश्यक पर्ने भए पनि एसपी प्रसाईको हकमा सांसद साहसँगको विवादलाई आधार मानिएको छ ।

गत शनिबार सर्लाहीको ईश्वरपुर नगरपालिकामा सडक विस्तारको विषयलाई लिएर झडप भएको थियो । झडपमा सांसद साह गम्भीर घाइते भएका थिए । उनको टाउकोमा २५ टाँका लगाइएको थियो । उनको सुरक्षामा कमजोरी देखाएर काज सरुवा गरिएको थियो ।