काठमाडौं । त्रिकोणात्मक टी-२० श्रृंखलाको उपाधिका लागि नेपाल र पपुवा न्यूगिनी (पीएनजी) विरुद्ध खेल शुरु भएको छ । कीर्तिपुरस्थित त्रिवि खेल मैदानमा खेल जारी छ । नेपालले टस हारेर पहिले ब्याटिङ शुरु गरेको छ ।
पीएनजीले टस जितेर फिल्डिङ रोज्दै नेपाललाई ब्याटिङको निम्तो दिएको थियो ।

नेपाल, पीएनजी र मलेसिया सम्मिलित श्रृंखलामा नेपाल अपराजित रहँदै फाइनल पुग्दा पीएनजी दोस्रो भएर फाइनल पुगेको हो ।

नेपालले डबल राउण्ड रोविन लिगमा खेलेको चारवटै खेल जितेको थियो ।

पीएनजीले भने ३ खेल हार्दा मलेसियालाई एक खेलमा मात्र हराएर २ अंक जोडेको थियो । मलेसियाले पनि १ खेल जित्दै उति नै अंक बनाएको थियो । तर नेट रनरेटमा भाग्यमानी बनेको पीएनजीले मलेसियालाई पछि पार्दै नेपालसँग फाइनल भिडन्त पक्का गरेको हो ।

कीर्तिपुरमै अघिल्लो साता भएको दुई खेलको एकदिवसीय अन्तर्राष्ट्रिय श्रृंखलाको दुवै खेलमा नेपाल पीएनजीसँग पराजित हुँदै श्रृंखला गुमाएको थियो । त्यसपछि टी-२० मा उत्कृष्ट प्रदर्शन गरिरहेको नेपालल एकदिवसीमा व्यहोरेको हारको बदला लिँदै श्रृंखलाको उपाधि जित्ने लक्ष्यमा छ । हुन त नेपालले टी-२० को दुवै लिग खेलमा पीएनजीलाई हराएर बदला लिइसकेको छ । तर फाइनल खेलमा पनि लिगको लय कायम राख्दै अपराजित रहेर उपाधि जित्ने नेपालको चाहना छ ।

उपाधीका लागि भएको आजको खेलमा नेपाली टिममा लिगको अन्तिम खेलमा घाइते भएका कमल सिंह ऐरीको स्थानमा सोमपाल कामीलाई मैदानमा उतारिएको छ । नेपालका तर्फबाट आजको खेलमा सन्दीप लामिछाने, आरिफ शेख, कुशल भुर्तेल, सोमपाल कामी, दीपेन्द्रसिंह ऐरी, आसिफ शेख, करण केसी, अविनाश बोहरा, लोकेश बम, कुशल मल्ल र रोहित पौडेलले खेल्नेछन् ।