काठमाडौं । नेकपा एकीकृत समाजवादीले बैशाख ८ भित्र स्थानीय तहका सम्पूर्ण उम्मेदवार चयन गरिसक्ने कार्यतालिका बनाएको छ । उम्मेदवार चयनका लागि ८ बुँदे मापदण्ड तय गरेर उसले वडा कमिटिबाट चैत ३० भित्र उम्मेदवार सिफारिस गरिसक्न र केन्द्रीय कमिटिबाट बैशाख ८ भित्र निर्णय गरिसक्ने गरी समय तालिका बनाएको हो ।

त्यस्तै अध्यक्ष माधव नेपालको नेतृत्वमा एक हजार १ सय ११ जना रहेको मूल निर्वाचन परिचालन समिति पनि बनाएको छ । एकीकृत समाजवादीको चैत २६ र २७ गते बसेको पार्टीको २० औं सचिवालय बैठकले उम्मेदवार छनौटको मापदण्ड, उम्मेदवार चयनको समय तालिकादेखि निर्वाचचन परिचालन कमिटिसम्म बनाएको हो ।

मूल निर्वाचन परिचालन समिति

पार्टी अध्यक्ष माधवकुमार नेपालको संयोजकत्वमा केन्द्रीय कमिटी, तिनोटै केन्द्रीय आयोग, केन्द्रीय सल्लाहकार परिषद् र केन्द्रीय जेष्ठ कम्युनिष्ट मञ्चका सबै पदाधिकारी एवं सदस्यहरु, केन्द्रीय परिषद् सदस्यहरु, प्रदेशका पदाधिकारीहरु, जिल्ला अध्यक्षहरु, जनसङ्गठनका केन्द्रीय पदाधिकारीहरु समेत रहेको ११११ सदस्यीय मूल निर्वाचन परिचालन कमिटी एसमाजवादीले बनाएको छ । त्यस्तै, महासचिव कमरेड डा. बेदुराम भुसालको संयोजकत्वमा प्रकाश ज्वाला, डा. गंगालाल तुलाधर, डा. विजय पौडेल, जगन्नाथ खतिवडा, जीवनराम श्रेष्ठ, विश्वनाथ प्याकुरेल, सोमप्रसाद पाण्डे, केदार सञ्जेल, सूर्य खत्री र
द्रोणाचार्य क्षेत्री सदस्य रहनु भएकोनिर्वाचन परिचालन केन्द्रीय सचिवालय गठन गरिएको छ ।

समय तालिका :
वडा कमिटीले यही चैत्र ३० गतेभित्र सिफारिस गरिसक्ने ।
ख. पालिका कमिटीले आगामी वैसाख २ गतेभित्र निर्णय र सिफारिस गरिसक्ने ।
ग. जिल्ला कमिटीले आगामी वैसाख ४ गतेभित्र निर्णय र सिफारिस गरिसक्ने ।
घ. प्रदेश कमिटीले आगामी वैसाख ६ गतेभित्र निर्णय र सिफारिस गरिसक्ने ।
ङ. केन्द्रीय कमिटीले आगामी वैसाख ८ गतेभित्र निर्णय गरिसक्ने ।

उम्मेदवार मापदण्ड
आगामी स्थानीय निर्वाचनका लागि पार्टीको तर्फबाट उम्मेदवारको सिफारिस एवं छनोटका लागि निम्न प्रकारका मादण्ड तय गरिएको छ :

क. पार्टी नीति र कार्यक्रमप्रति प्रतिबद्ध रहेको ।
ख. पार्टीमा योगदान गरेको र विद्रोहमा भूमिका खेलेको ।
ग. पार्टीप्रतिको निष्टा र अनुशासनमा दृढ ।
घ. आर्थिक एवं नैतिक आचरण राम्रो रहेको ।
ङ. जनतामा स्थापित एवं लोकप्रिय ।
च. स्वच्छ छवी भएको र सुशासनको पक्षपाति ।
छ. कार्यक्षमता राम्रो भएको ।
ज. समावेशीतालाई ध्यान दिने ।

हेर्नुहोस् पत्र