काठमाडौँ । त्रिभुवन अन्तर्राष्ट्रिय विमान स्थलबाट करिब साढे दुई किलो सुनसहित पाँच जना पक्राउ परेका छन् । बिहीबार दुबईबाट काठमाडौँ आइपुगेका पाँच जनाको साथबाट दुई किलो ३३२ ग्राम सुन फेला परेको भन्सार विभागले जनाएको छ ।

हिमालय एयरको विमानभित्र सुनगाभा सप्लायर्स एण्ड सरसफाई प्रा.लि.मार्फत सरसफाई गर्ने भनी ड्यूटी खटिएका व्यक्तिहरूको साथबाट उक्त सुन बरामद गरेको हो ।

यस क्रममा पाँचथर याङवरक गाउँपालिका ४ का २८ वर्षीय भिम कुमार माबोले विमानको शौचालयभित्र फोहरसँगै रहेको सुनको बिस्कुट बाहिर ल्याएर फोहोर जम्मा गर्ने स्थानमा ल्याएका थिए । यस्तै, उनको सहकर्मी नुवाकोट तादी गाउँपालिका ५ का २७ वर्षीय सुमन तामाङसहित मिलेर आआफ्नो पर्समा राखेका थिए ।

सोही क्रममा गेटमा जाँच हुँदा माबोले बोकेको सुनको बिस्कुट करिब एक किलो १६६ ग्राम फेला परेको थियो । उक्त सुनको मूल्य ९७ लाख, ९६ हजार रुपैयाँ हुन आउँछ । यस्तै, तामाङले बोकेर ल्याएको सुनको बिस्कुट करिब एक किलो १६६ ग्राम तौल फेला परेको थियो । यसको मूल्य करिब ९७ लाख ९६ हजार रुपैयाँ रहेको छ ।

उक्त काममा सहयोग गर्ने उदयपुर लिम्चुङबुङ गाउँपालिका २ का २८ वर्षीय राजेश राई, दोलखा गौरीशंकर गाउँपालिका २ का ट्याक्सी चालक ४१ वर्षीय हेम बहादुर थापा र सुनगाभा सप्लायर्स एण्ड सरसफाई प्रा.लि.मार्फत विमानभित्र सरसफाई सप्तरी सुरुङ्गा नगरपालिका ४ का ३६ वर्षीय ताराकान्त चौधरीलाई पनि प्रहरीले पक्राउ गरेको छ ।