काठमाडौँ । सप्तरीमा लागू औषधसहित बिहीबार प्रहरीले एक जनालाई पक्राउ गरेको छ । पक्राउ पर्नेमा सप्तरी बोदेबर्साइन नगरपालिका ९ देउरीका १९ वर्षीय शंकर यादव रहेका छन् ।

जिल्ला प्रहरी कार्यालय सप्तरी र इलाका प्रहरी कार्यालय कडरबोना सप्तरीबाट खटिएका प्रहरीले लागू औषध घरमा बेच्ने उद्देश्यले भण्डारण गरी राखेको अवस्थामा गोप्य सूचनाको आधारमा उनलाई पक्राउ गरेको जिल्ला प्रहरी कार्यालयका प्रहरी प्रवक्ता माधवप्रसाद काफ्लेले जानकारी दिए ।

यादवको साथबाट नाइट्राभेट १० लेखिएको ट्याबलेट एक हजार २५० पिस, डाइजेपाम इन्जेक्सन ७५० एम्पुल, फेनेरागन ७५० एम्पुल, नुफिन इन्जेक्सन ७५० एम्पुल फेला परेको छ ।

उनीमाथि लागू औषध कारोबार सम्बन्धित मुद्दा दर्ता गरी सप्तरी जिल्ला अदालतबाट म्याद थप गरिएको छ । घटनाको अनुसन्धान भइरहेको प्रवक्ता काफ्लेले बताए ।