काठमाडौँ । नेपाली कांग्रेसका नेता रामचन्द्र पौडेलले काठमाडौँ महानगरले फोहोर व्यवस्थापन गर्न नसक्नु जस्तो नालायकीपन केही नभएको बताएका छन् ।

सत्ता गठबन्धनले काठमाडौँमा आयोजना गरेको चुनावी सभालाई सम्बोधन गर्दै उनले काठमाडौँ महानगरका नेतृत्वको नालायकीपनका कारण काठमाडौाँबासीले दुःख पाएको बताए । उनले काठमाडौँ महानगरबासीले ठूलो मात्रामा कर तिरेर बसे पनि सुविधा नपाएको दाबी गरे ।

‘बञ्चरे डाँडाले मात्रै फोहोर व्यवस्थान गर्न सक्दैन, यसको स्थायी समाधान होस्, जग्गा किनेर भए पनि ठाउँठाउँमा पार्क बनाउन जरुरी छ,’ नेता पौडेलले भने, ‘अहिले काठमाडौँमा सास फेर्न कठिन छ, यसका लागि सुशासन कायम गरी महानगरपालिकाको विकास हुनु पर्यो ।’

उनले स्थायी सरकार नपाएको भन्दै यसका लागि गठबन्धन गर्नु परेको बताए । उनले राजनीतिक स्थिर नपाउँदा देश विकास गर्न नपाएको बताएका थिए । अहिले केपी ओलीलाई नै बलियो बनाउन गठबन्धनभित्र खेल भएको बताउँदै नेता पौडेलले चुनाव चिन्ह हेरेर मात्रै भोट हाल्ने भन्ने प्रवृत्ति गठबन्धनविरोधी भएको बताए ।

‘संविधानलाई भत्काएर, लोकतन्त्र बिगारेर प्रतिगामी शक्ति एक ठाउँमा भएकाले अहिले प्रतिगामीविरुद्ध एक हुनु आवश्यक भएको हो,’ उनले भने, ‘गठबन्धनलाई बलियो बनाउऔँ ।’