काठमाडौँ । नेकपा माओवादी केन्द्रको भातृ संगठन अखिल (क्रान्तिकारी)ले शिक्षा मन्त्री देवेन्द्र पौडेललाई ज्ञापन पत्र बुझाएको छ । अध्यक्ष पञ्चा सिंहको नेतृत्वको टोलीले आज पाठ्यपुस्तक उपलब्ध गराउने विषयमा ज्ञापन पत्र बुझाएको हो ।

नयाँ शैक्षिक सत्र सुरु भए पनि सामुदायिक तथा संस्थागत विद्यालयमा पाठ्यपुस्तक नपुग्दा पठनपाठन प्रभावित भएको भन्दै अखिल क्रान्तिकारीले शिक्षा मन्त्रालयको ध्यानाकर्षण गराएको हो ।

‘विद्यालय तहको पाठ्यपुस्तक छपाई गर्ने जनक शिक्षा सामाग्री केन्द्रका निर्देशक अनिलकुमार झाले स्थानीय तह निर्वाचन, रुस–युक्रेन युद्ध साथै कोभिडलगायतलाई कारण देखाएर पाठ्यपुस्तक छाप्न ढिलाई गरी गैरजिम्मेवार देखाएको छ,’ ज्ञापन पत्रमा भनिएको छ ।

शिक्षा मन्त्रालय पुगेका अखिलका नेताहरूले मन्त्री पौडेलसँग भेट गरी पाठ्यपुस्तक छपाई गरी विद्यालयमा यथाशीघ्र पठाउन माग गरेका थिए ।