काठमाडौँ । पञ्चदेवल विनायक नगरपालिका ४ का १५ वर्षीय विनोद शाही मृत फेला परेका छन् । उनी विगत पाँच दिनदेखि बेपत्ता भएका थिए ।

शनिबार बिहान गाउँ नजिकैको जंगलमा शाहीको शव भेटिएको अछाम जिल्ला प्रहरी कार्यालयले जनाएको छ । जेठ १७ गते गाउँकै युवाबीच झगडा भएपछि उनी बेपत्ता भएका थिए ।

त्यस दिन युवाहरूबीच झगडा साम्य पार्न प्रहरी गाउँमै पुगेको थियो । झगडा स्थलमा प्रहरी पुगे पनि त्यसै दिनबाट शाही बेपत्ता भएका थिए ।

प्रहरीले झगडा गर्ने युवाहरूलाई नियन्त्रणमा लिन खोज्दाको भिडियो पनि सामाजिक सञ्जालमा भाइरल छ । उक्त भिडियोमा प्रहरीले एक युवकलाई लछारपछार गर्दै नियन्त्रणमा लिएको छ ।

यस्तै, स्थानीय महिलाहरूले आफूहरूमाथि प्रहरीले दुर्व्यवहार गरेको आरोप लगाएका छन् ।