काठमाडौँ । जिल्ला प्रहरी कार्यालय बागलुङले अवैध लागूऔषध अफिमको कारोबारमा संलग्न रुकुम पूर्वको पुथाउत्तरगंगा गाउँपालिका २ की राखीलाक घर्तीमगरलाई पक्राउ गरेको छ ।

विसं २०७७ मंसिर ४ गते बागलुङको ढोरपाटन नगरपालिका १ स्थित निसी भल्कोट सन्दीप गेष्ट हाउसमा दश किलो अफिम छाडेर फरार भएकी घर्ती मगरलाई शनिबार नियन्त्रणमा लिइएको प्रहरीले जनाएको छ ।

३३ वर्षीया घर्तीमगर पुथाउत्तरगंगा २ की पूर्व वडा सदस्यसमेत हुन् । आफ्नो नामथर परिवर्तन गरी गेष्ट हाउसमा बसेकी उनी अफिमसहित तौल गर्न प्रयोग हुने डिजिटल काँटा, सिक्का, सिमकार्ड, मोबाइल, कपडालगायत सामग्री त्यहीँ छाडेर फरार भएकी थिइन् ।

घटनालगत्तै प्रहरीले अफिमलगायत सामग्री बरामद गरी फरार घर्तीमगरको खोजी सुरु गरेको थियो । खोजतलासका क्रममा डेढ वर्षपछि रुकुम पूर्वको सिस्ने गाउँपालिका ५ बाट उनलाई नियन्त्रणमा लिइएको जिप्रकाका सूचना अधिकारी एवं प्रहरी नायव उपरीक्षक इन्द्रबहादुर राईले बताए ।