काठमाडौँ । नेपाली कांग्रेसकी सांसद पार्वता डीसी चौधरीले कृषि तथा पशुपन्छी विकासमन्त्री महिन्द्रराय यादवले सरकार र नेपाली कांग्रेसको आलोचना हुने गरी काम गरेको बताएकी छन् ।

प्रतिनिधिसभा बैठकमा प्रमुख प्रतिप्रक्षी दल नेकपा एमालेले दर्ता गरेको रासायनिक मल अभावसम्बन्धी अत्यन्त जरुरी महत्वको प्रस्तावमाथि छलफलमा बोल्दै उनले आफ्नै पार्टीको बेइजती हुने गरी काम गरेको बताएकी हुन् ।

किसान मल नपाएर छटपटाउँदै गर्दा कृषिमन्त्रीको भारत भ्रमणलाई लिएर उनले गठबन्धनले राम्रो व्यक्तिलाई मन्त्री बनाउँदा नसक्दा सरकार र कांग्रेसको बेइज्जत भएको धारणा राखेकी थिइन् ।

‘हिजो हाम्रो सभापतिले चाहेर पनि एक्लै काम गर्न नसकेको बताउनु भयो, यो सबै तपाईंहरु जस्ता मन्त्रीले गर्दा हाम्रा प्रधानमन्त्री र हाम्रो सभापतिले काम गर्न सक्नु भएन,’ कृषि मन्त्रीतर्फ हेर्दै उनले भनिन्, बेइजत त हाम्रै हुन्छ नि नेतृत्व हाम्रो छ ।’