काठमाडौँ । प्रतिनिधिसभाको आजको बैठक आधा घण्टा स्थगित भएको छ । नेकपा एमालेका प्रमुख सचेतक विशाल भट्टराईले संसदमा प्रस्तुत जरुरी सार्वजनिक महत्वको विषयमाथि सांसदले बोल्ने क्रम सकिएपछि सभामुख सापकोटाले बैठक आधा घण्टाका लागि स्थगित गरेका हुन् ।

उक्त प्रस्तावमाथिको छलफलमा भाग लिँदै सांसद पूर्णकुमारी सुवेदीले विगतदेखि नै पहल हुँदै आए पनि मलको आपूर्तिको समस्या कायमै रहेको बताएकी थिइन् ।

उनले अर्गानिक खेती र अर्गानिक मल उद्योगको विषयमा कृषि समितिमा समेत आवाज उठेको स्मरण गराउँदै तत्कालीन समस्या भनेको जिटुजिमार्फत किसानको खेतमा मल पुग्ने वातावरण बनाउनु रहेको बताएकी थिइन् ।

एक देशबाट मात्रै मल ल्याउँदा समस्या भएकाले अर्को मुलुकबाट आउने नाका खुला गर्न उनले सरकारको ध्यानाकर्षण गराएकी थिइन् ।

यस्तै, सांसद शक्तिबहादुर बस्नेतले मुलुकको विभिन्न परिस्थितिले मुलुकमा सधैँ मल अभाव हुँदै आएको र समस्या समाधानका लागि हरित अर्थतन्त्र महत्वपूर्ण भएको बताएका थिए ।

उनले तत्कालका लागि सुशासनलाई ध्यान दिनु पर्नेमा जोड दिए । टेन्डरदेखि नै कार्टेलिङ हुने गरेको जानकारी गराउँदै यो समस्या कृषि मन्त्रीबाटै समाधान हुन नसक्ने भएकाले प्रधानमन्त्री स्तरबाटै उच्चस्तरीय संवाद जरुरी रहेको बताए ।

सांसद महेश बस्नेत फोहोरलाई कम्पोष्ट मलका रुपमा रुपान्तरण गर्ने योजना ल्याउनु पर्ने आवश्यकता औँल्याएका थिए । उनले नीतिगत सुधारदेखि मन्त्रीको व्यवहार सुधार हुनु जरुरी रहेको बताएका थिए ।

सांसद देवप्रसाद तिमिल्सिनाले किसानलाई मलखाद दिनु पर्ने कुरा सदनमा पटकपटक उठाउँदै आएको स्मरण गर्दै समस्या समाधान हुन नसकेको बताएका थिए ।