काठमाडौँ । पर्साको बहुदरमाई नगरपालिका २ सिसियाडी बैरियाटोलमा ४० वर्षीय राजेश रामको हत्यामा संलग्न अरोपमा आफ्नै भिनाजु पक्राउ परेकी छन् । उनीसहित अन्य ४ जनालाई प्रहरीले पक्राउ गरेको छ ।

जगरनाथपुर गाउँपालिका ६ बस्ने ४५ वर्षीय हिरामन महरा, ३६ वर्षीय रामबालक महरा, ४० वर्षीया बसन्ती देवी, ३५ वर्षीया सुनितादेवी र २२ वर्षीया रिंकु देवीलाई पक्राउ गरिएको जिल्ला प्रहरी कार्यालय पर्साले जनाएको छ ।

उनीहरुलाई ७ दिन हिरासतमा राख्न पर्सा जिल्ला अदालतबाट अनुमति लिइएको प्रहरीले जनाएको छ । जेठ २८ गते बिहान करिब ११ बजे जगरनाथपुर ६ स्थित नारा खोलाको खोल्सीमा घोप्टो परेको र घाँटीमा गम्छाले कसिएको अवस्थामा राजेशको शव फेला परेको थियो । राजेश जेठ २४ गते दिदीको घरमा गएका थिए ।

उनको हत्यामा भिनाजुसहित परिवारका ५ जना सदस्य संलग्न रहेको प्रहरीले आशंका गरेको छ ।