काठमाडौँ । नेपालको पहिलो बैंक नेपाल बैंक लिमिटेडले आफ्ना ग्राहकलाई बैंकको मोबाइल बैंकिङ्ग एप प्रयोग गर्दा डाटा शुल्क नलाग्ने व्यवस्था गरेको छ । बैंकमा खाता भएका र नेपाल टेलिकमको सिमकार्ड प्रयोग गर्ने ग्राहकलाइ सो सुविधा दिने भएको हो ।

नेपाल बैंक र नेपाल टेलिकमबीच भएको सम्झौतामा नेपाल टेलिकमका चिफ कमर्सियल अफिसर संगीता पहाडी र बैंकका चिफ फाइनान्स अफिसर होम बहादुर खड्काले हस्ताक्षर गरेका थिए ।

यस्तै, बैंकका प्रमुख कार्यकारी अधिकृत कृष्ण बहादुर अधिकारी र टेलिकमका प्रबन्ध निर्देशक सुनिल पौडेलको रोहबरमा नेपाल टेलिकमको केन्द्रीय कार्यालयमा एक समारोहबीच हस्ताक्षर भएको हो । सम्झौताअनुसार टेलिकमको मोबाइल नम्बर प्रयोग गरी नेपाल बैंकको मोबाइल बैंकिङ्ग रजिष्टर गर्ने सम्पूर्ण ग्राहकले इन्टरनेट वा डाटाको आवश्यकता नपर्ने भएको हो ।

नेपालभर २१३ शाखा, १७९ एटिएम मेसिन साथै ४९ वटा एक्टेन्सन काउन्टरमार्फत बैंकले करिब २१ लाख ग्राहकलाई वित्तीय सेवा दिँदै आएको छ ।