काठमाडौँ । नेकपा एमालेनिकट विद्यार्थी संगठन अनेरास्ववियूले गरेको प्रदर्शनमा प्रहरीले हस्तक्षेप गरेको छ । काठमाडौँको मीनभवनमा विद्यार्थी संगठनले गरेको प्रदर्शनमा प्रहरीले हस्तक्षेप गरेको हो ।

विद्यार्थी संगठनले अमेरिकी स्टेट पार्टनरसिप प्रोग्राम (एसपीपी)को सम्झौता रोक्नु पर्ने माग राख्दै आन्दोलन गरेको हो । उनीहरूले अर्थमन्त्री जनार्दन शर्मालाई कारबाही गर्नु पर्ने मागसमेत राखेका थिए ।

यस्तै, आन्दोलनमा सहभागी विद्यार्थीले पेट्रोलियम पदार्थको मूल्य घटाउनु पर्ने माग राखेका थिए । नेपाल कमर्श क्याम्पसको अनेरास्ववियूले निकालेको प्रदर्शनमा प्रहरीले क्याम्पस हाताभित्रै गएर विद्यार्थीमाथि धरपकड गरेको विद्यार्थी नेताहरूले आरोप लगाएका छन् ।

प्रदर्शनमा क्याम्पसका सचिव प्रकाश रावल, उपाध्यक्ष प्रवीन गिरी र रविन सिंह घाइते भएका छन् ।