काठमाडौँ । सत्ता गठबन्धन दल जनता समाजवादी पार्टी (जसपा)का संघीय परिषद्का अध्यक्ष बाबुराम भट्टराईले पार्टी पुनर्गठनका लागि अपिल गरेका छन् । उनले पार्टीमा देखा परेको अन्र्तविरोध अन्त्य भएको बताउँदै पार्टी पुनर्गठनमा लाग्न सबै नेता तथा कार्यकर्तालाई आह्वान गरेका हुन् ।

उता, जसपाका अध्यक्ष उपेन्द्र यादवले गत २९ र ३० गते पार्टीको केन्द्रीय समितिको बैठकमार्फत भट्टराईसहित नौ जना नेताहरूलाई पार्टीबाट निष्कासनसम्मको कारबाही गरिसकेको छ ।

‘जसपामा लामो समयदेखि देखिएका वैचारिक, राजनीतिक, सांगठनिक र केन्द्रीय समिति अध्यक्षको स्वैच्छाचारी कार्य शैलीविरुद्धको बहस उत्कर्षमा पुग्दै गर्दा केन्द्रीय समितिको अलगअलग बैठक गर्ने तहसम्म पुगेको कुरा सबैलाई ज्ञात नै छ’ अध्यक्ष भट्टराईले जारी गरेको विज्ञप्तिमा भनिएको छ, ‘केन्द्रीय समितिको विस्तारित बैठक यही असार २८ र २९ गते सम्पन्न भएको छ ।’

अध्यक्ष भट्टराईले उपेन्द्र यादवको अध्यक्षतामा बसेको असार २९ र ३० गतेको बैठकले पार्टीलाई एकताबद्ध बनाउन पहल नगरी स्वैच्छाचारी शैलीमा केन्द्रीय कार्यकारिणी सदस्यलाई पदमुक्त गरेको भन्दै विरोध गरेका छन् ।

उनले पार्टी रूपान्तरणका लागि अनवरत रूपमा लागिरहेका सबै केन्द्रीय सदस्य तथा कार्यकर्तालाई पार्टी पुनर्गठनका लागि अपिल गरेका हुन् ।