काठमाडौँ । नेपाल प्रहरीले अवैध लागु औषध खैरो हिरोइनसहित चार जनालाई पक्राउ गरेको छ ।

प्रहरीको लागु औषध नियन्त्रण ब्यूरो कोटेश्वरको टोलीले काठमाडौँ महानगर ६ बौद्ध पिपलबोटमा लागु औषध कारोबारमा संलग्न चार जनालाई बिहीबार पक्राउ गरी आज सार्वजनिक गरेको हो ।

पक्राउ पर्नेमा सिन्धुपाल्चोक हेलम्बुका २६ वर्षीय नीमा लामा, मोरङ शनिश्चरेका २९ वर्षीय किसान आङदेम्बे, रामेछापका ३५ वर्षीय कृष्णबहादुर मगर र मोरङ शनिश्चरेका २६ वर्षीय मणिराज सुब्बा रहेका छन् ।

ब्यूरोका प्रहरी उपरीक्षक जीवनकुमार श्रेष्ठले अवैध रुपमा लागुऔषध बोकेर बिक्री वितरण गर्न हिँडेको अवस्थामा बौद्धबाट उनीहरुलाई पक्राउ गरिएको जानकारी दिए ।