कैलाली । जिल्लाको धनगढी उपमहानगर २ पुरानो भन्सार रोडमा आज मोटरसाइकलले ठक्कर दिँदा एक जनाको मृत्यु भएको छ ।

मृत्यु हुनेमा धनगढी उपमहानगर २ बस्ने अन्दाजी ५५ वर्षीय नेत्रप्रसाद पन्त रहेको प्रहरीले जनाएको छ । जिल्ला प्रहरी कार्यालय कैलालीका अनुसार धनगढी उपमहानगर ३ का २२ वर्षीय सौजन खड्काले चलाएको से ३ प ९९० नंको मोटरसाइकलले पैदलयात्री पन्तलाई ठक्कर दिएको थियो ।

घाइते पन्तको उपचारका क्रममा माया मेट्रो अस्पतालमा आज साँझ मृत्यु भएको प्रहरीले जनाएको छ ।

मोटरसाइकल चालक खड्का र पछाडि सवार बैतडी दशरथचन्द ८ बस्ने २२ वर्षीय रामचन्द्र शर्मालाई नियन्त्रणमा लिई थप अनुसन्धान भइरहेको जिल्ला प्रहरी कार्यालय कैलालीका प्रहरी नायव उपरीक्षक वेदप्रकाश जोशीले जानकारी दिए ।