काठमाडौँ । निर्वाचन आयोगले गत वैशाख ३० गते सम्पन्न गरेको स्थानीय तहको निर्वाचनअनुसार नेपाली कांग्रेस पहिलो पार्टी बनेको छ । आयोगले स्थानीय तह निर्वाचनमा लोकप्रिय मतमा नेपाली कांग्रेस पहिलो दल भएको बताएको हो ।

मंगलबार आयोगमा आयोजित पत्रकार सम्मेलनमा बोल्दै प्रमुख निर्वाचन आयुक्त दिनेशकुमार थपलियाले कांग्रेसले नेकपा एमालेको भन्दा एक लाख ४४ हजार ५९१ मत बढी ल्याएको बताएका हुन् । आयोगले वडाध्यक्षले प्राप्त गरेको मतका आधारमा दलको लोकप्रिय मतको गणना गरेको थियो ।

आयोगको विवरणअनुसार नेपाली कांग्रेसले ३९ लाख ५६ हजार १९३ मत पाएको छ । त्यस्तै नेकपा एमालेले ३८ लाख ११ हजार ६०२ मत पाएको हो । कांग्रेसले कूल मतको ३४‍.२८ र एमाले ३३.०३ प्रतिशत पाएको छ ।

यस्तै, नेकपा माओवादी केन्द्रले १५ लाख तीन हजार २४७ मत पाउँदा जनता समाजवादी पार्टीले पाँच लाख ७७ हजार ३८०, नेकपा एकीकृत समाजवादीले चार लाख २२ हजार ७३७ र राष्ट्रिय प्रजातन्त्र पार्टीले तीन लाख ६४ हजार १६० मत पाएको छ ।