काठमाडौँ । उद्योग, वाणिज्य तथा आपूर्तिमन्त्री दिलेन्द्रप्रसाद बडूले नेपाल आयल निगमलाई निजीकरण गर्ने पक्षमा आफू नरहेको स्पट पार्नु भएको छ । अर्बौंको कमिशन लिएर निगमलाई निजीकरण गर्न लागिएको भन्ने चर्चा भईरहेका बेला उनले स्पष्टिकरण दिएका हुन् ।

आइतबार प्रतिनिधिसभाको बैठकमा उद्योग, वाणिज्य र श्रम तथा उपभोक्ता हित समितिको बैठकमा बोल्दै उनले आयल निगमलाई आफूले निजीकरण गर्न लागेको भन्ने कुरा निराधार, भ्रामक र आधारहिन भएको बताए । उनले प्रमुख प्रतिपक्ष दल नेकपा एमालेका अध्यक्ष केपी शर्मा ओलीप्रति संकेत गर्दै अर्बौंको कमिशन लिएर निगमलाई निजीकरण गर्न लागिएको भन्ने गैरजिम्मेवार अभिव्यक्ति दिएकोप्रति असन्तुष्टि व्यक्त गरे ।

उनले आफूले निगमको निजीकरण नभई त्यसलाई पारदर्शी बनाउन चाहेको दाबी गरे । ‘मैले नेपाल आयल निगमको पारदर्शिताको कुरा गरेको छु, तर निजीकरणको हल्ला भइराखेको छ, करोडौं, अर्बौंको कमिशनको कुरा आइराखेको छ, त्यसमा मैले आधी लिएको कुरा जिम्मेवार नेताहरुले बोल्नु भएको छ, यो निराधार, भ्रामक ढंगले भ्रम फैल्याउने कुरा जुन भयो, यो भ्रम फैल्याउनेकै गैरजिम्मेवारी हो,’ उनले भने ।

मन्त्री बडूले पेट्रोलियम पदार्थमा देखिएको घाटा कम गर्न तत्कालका लागि विद्युतको खपत बढाउनु पर्नेमा जोड दिए । उनले पेट्रोलियम पदार्थमा देखिएको समस्या समाधानका लागि सरकारले पेट्रोलियम पदार्थ सम्बन्धि ऐन नै निर्माण गर्ने तयारी गरिरहेको दाबी गरे । नेपाल आयल निगमले आर्थिक वर्ष २०७८–७९ को असार मसान्तसम्म नेपाल सरकारलाई करिब एक खर्ब २० अर्ब ६ करोड राजस्व बुझाएको जानकारी दिए ।