काठमाडौँ । सरकारले वरिष्ठ सहसचिव डा. दीपक काफ्लेलाई सचिवमा बढुवा गरेको छ । बिहीबार बसेको मन्त्रीपरिषद्को बैठकले काफलेलाई सचिबमा बढुवा गर्ने निर्णय गरेको सरकारका एक मन्त्रीले जानकारी दिए ।

लोक सेवा आयोगका अध्यक्ष माधव प्रसाद रेग्मीको अध्यक्षतामा आइतबार बसेको बढुवा सिफारिस समितिको बैठकले वरिष्ठ सहसचिव त्रय डा. काफ्लेसहित नारायण शर्मा दुवाडी र दिनेश घिमिरेको नाम सिफारिस गरेको थियो । जसमध्ये काफलेको नाम पहिलो नम्बरमा राखेर बढुवा सिफारिस गरिएको थियो ।

बिहीबार बसेको बैठकले सोही आधारमा पहलिो सूचीमा रहेका काफ्लेलाई नै बढुवा गर्ने निर्णय गरेको हो ।

डा. काफ्ले श्रम, रोजगार तथा सामाजिक सुरक्षा मन्त्रालयको श्रम सम्बन्ध तथा सामाजिक सुरक्षा महाशाखा प्रमुखको जिम्मेवारीमा थिए ।

संस्कृति, पर्यटन तथा नागरिक उड्डयन मन्त्रालयका सचिव महेश्वर न्यौपाने अनिवार्य अवकाशमा गएसँगै प्रशासन तर्फ एक सचिव पद रिक्त भएको थियो । त्यही रिक्त पदमा सरकारले काफलेको बढुवा गरेको हो ।