काठमाडौँ । बेलायत पठादिने भन्दै १५ लाख रुपैयाँ ठगी गरेको अभियोगमा प्रहरीले एक जनालाई पक्राउ गरेको छ । पक्राउ पर्नेमा काठमाडौँ महानगर २९ सामाखुसी बस्ने इलाम नगरपालिका १ नारायणटारका ३७ वर्षीय प्रकाश राई छन् ।

उनलाई आइतबार दिउँसो प्रहरीले पक्राउ गरेको हो । उनले पाँच जनालाई सिजनल भिसामा बेलायत जानका लागि प्रतिव्यक्ति नगद ९ लाख रुपैयाँ लाग्ने र बेलायत पुगेपछि प्रतिष्ठित एग्रिकल्चर कम्पनीमा काम लगाइदिने प्रलोभन देखाएको प्रहरीले जनाएको छ ।

प्रहरीका अनुसार उनले बेलायतमा मासिक चार लाख रुपैयाँसम्म तलब हुने विश्वास दिलाई उनीहरूबाट प्रतिव्यक्ति ताीन लाख रुपैयाँ लिएर ठगी गरेका थिए ।

पीडितबाट रकम लिई सम्पर्कविहीन भएका उनलाई काठमाडौँ उपत्यका अपराध अनुसन्धान कार्यालयबाट खटिएको प्रहरीले काठमाडौँ सिनामंगल शम्भुमार्गबाट पक्राउ गरेको हो । उनलाई थप अनुसन्धान तथा कारबाहीका लागि वैदेशिक रोजगार विभाग बुद्धनगर काठमाडौँ पठाइएको छ ।