काठमाडौं । नाडा अटोमोबाइल्स एसोसियसन अफ नेपालले आयोजना गरेको ‘नाडा ईभी एक्सपो’ बिहीबारदेखि भृकुटीमण्डपमा भइरहेको छ। विद्युतीय सवारी साधनको प्रवद्धृन गर्ने लक्ष्यका साथ ‘नाडा ईभी एक्सपो’ नेपालमै पहिलोपटक आयोजना गरिएको हो ।

उक्त एक्सपो (बिहीबारदेखि आईतबार) असोज ६ गते देखि ९ गतेसम्म (चार दिन) सञ्चालन हुनेछ। एक्सपोको उद्घाटन अर्थमन्त्री जनार्दन शर्माले गरेका थिए । इभी एक्स्पोले पेट्रोलियम पदार्थको अधिक आयातलाई न्युनीकरण गरी बढ्दो अवस्थामा रहेको व्यापार घाटा न्युनीकरणमा टेवा पुग्ने सम्बद्ध आयोजक पक्षको छ ।

उद्घाटन कार्यक्रममा बोल्दै नाडा अटोबाइल्स एसोशिएसनका अध्यक्ष ध्रुबबहादुर थापाले अटोमोबाइल क्षेत्र राज्यलाई सबैभन्दा धेरै राजस्व बुझाउने क्षेत्र भएपनि सरकारले कडाइ गरेको गुनासो गरे । थापाले भने, ‘राज्यको कुल राजस्वमा २५ प्रतिशत योगदान अटोमोबाइल्स क्षेत्रको रहेको दाबी गरे। ‘प्रत्यक्ष रोजगारीमा १ लाख र अप्रत्यक्ष रोजगारीमा १० लाख रोजगारी उपलब्ध गराएको छ ।’
अटो व्यवसायीहरुले गत आवमा मात्रै नेपालमा ९९ अर्ब बराबरको सवारी साधन आयात गरेका र त्यसबाट राज्यलाई ९० अर्ब राजस्व प्राप्त भएको समेत अध्यक्ष थापाले जानकारी दिए ।
अध्यक्ष थापाले विद्युतीय सवारीसाधनको माग दिनप्रतिदिन बढ्दै गएको र यी सवारीसाधनको प्रयोगले प्रदूषण नियन्त्रण गर्नुका साथै आफ्नै देशमा उत्पादित जलविद्युत खपत बढाउने र देशलाई आत्मनिर्भर बनाउन बताए ।

वर्तमान समयमा विद्युतीय सवारी साधनहरुको महत्व दिन प्रतिदिन बढ्दै गएको र यस्ता सवारी साधनहरुको बढदो प्रयोगले आफनै मुलुकमा उत्पादित जल विद्युतको उपभोग बढ्न गई देशलाई आत्मनिर्भर बनाउन समेत सहयोग पुग्ने विश्वास आयोजकको रहेको छ ।

उक्त एक्स्पोमा ठूला तथा साना गरि ५१ वटा स्टल र ब्लकहरु रहने छन् । एक्सोमा ७ वटा ब्राण्डका चार पांग्रे , एउटा तीन पांग्रे , १६ वटा ब्राण्डका दुई पांग्रे , ३ वटा बाण्डका टायर , २ वटा बाण्डका ब्याटरी , ९ वटा पार्टर पुर्जा , ग्यारेज उपकरण कम्पनी एवं अटो पत्रिका तथा ४ वटा वित्तिय संस्थाहरुको सहभागिता रहेको छ ।

एक्स्पोमा टेस्ला, हुण्डाई, टाटा, बिवाईडी, नेटा, महिन्द्रा लगायत ब्राण्डका चार प्राङ्ग्रे तथा २ पाङ्ग्रे सवारी साधनहरु अवलोकनकर्ताको चासो बन्न सक्छन् ।

आम सर्ब साधारणलाई ट्राफिक नियम तथा सडक सुरक्षा सम्बन्धी सूचना प्रवाह गर्नका लागि महानगरीय ट्राफिक प्रहरी महाशाखा, काडमाडौंको सुचना कक्ष समेत प्रदर्शनीमा राखिएको छ ।

एक्स्पोले नेपालमा विद्युतीय सवारी साधनबारे अत्याधिक जनचेतना अभिवृद्धि गर्न तथा अटो व्यवसायीहरुको समस्टिगत प्रवर्धनमा प्रत्यक्ष तथा सकारात्मक प्रभाव पार्नेमा आयोजक विश्वस्त छ ।

एक्स्पोको शिर्ष प्रायोजक सिएट टायर रहेको छ । भने सह-प्रायोजकमा शिखर इन्स्योरेन्स तथा डिजिटल पेमेन्ट पार्टनरमा भुक्तानी सेवाप्रदायक खल्ती एप रहेको छ । एक्स्पोलाई व्यवस्थित बनाउन,प्रदर्शनी स्थलमा भिडभाड कम गर्न एवं आगन्तुकहरुको भ्रमणलाई सहज बनाउन खल्ती एप मार्फत अनलाईन टिकट खरिद गर्न सकिने व्यवस्था मिलाइएको छ ।

एक्स्पोको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेजले गरेको छ ।