काठमाडौँ । सेयर बजार घट्ने क्रममा मंगलबार पनि निरन्तरता पाएको छ । आज नेप्से परिसूचकसँगै दैनिक कारोबार रकम पनि सुस्त देखिएको छ ।

मंगलबार नेप्से सूचक १६.०६ अंकले घटेर १८५५.१६ विन्दुमा आएको छ । यस्तै, ५५ करोड रुपैयाँको सेयर कारोबार भएको छ ।

दसैंअघि नै सकारात्मक बनेको बजार दसैंपछिको पहिलो कारोबारमा थप सुधार भएको थियो । आज २२९ कम्पनीको १७ लाख ६८ हजारभन्दा बढी कित्ता सेयर कारोबार भएको छ ।

ट्रेडिङ, होटल र लगानी समूहका सूचकमा सुधार भएको छ भने बाँकी समूहका सूचक घटेका छन् । तीन करोड १० लाख रुपैयाँभन्दा बढीसहित कारोबार रकममा नबिल बैंक अग्रस्थानमा रहेको छ ।

यसैगरी, दोस्रो र तेस्रो स्थानमा क्रमशः नेपाल लाइफ इन्स्योरेन्स र हिमालयन पावर पार्टनर परेका छन् ।