काठमाडौँ । नेपाल प्रहरी प्रधान कार्यालय साइबर ब्यूरोको नक्कली फेसबुक पेज बनाएको अभियोगमा एक जना पक्राउ परेका छन् ।

पक्राउ पर्नेमा चितवन रत्ननगर नगरपालिका ५ झुवानीटोल बस्ने १८ वर्षीय किशोर रहेका छन् । सर्वसाधारणलाई झुक्यानमा पारी ठगी गर्ने उद्देश्यले ब्यूरोको नक्कली फेसबुक पेज बनाएका उनलाई जिल्ला प्रहरी कार्यालय चितवनको सहयोगमा नेपाल प्रहरी प्रधान कार्यालय साइबर ब्यूरोले पक्राउ गरेको हो ।

उनी उपर विद्युतीय कारोबार ऐन, २०६३ अन्तर्गतको कसूरमा जिल्ला अदालत काठमाडौँबाट पाँच दिन म्याद थप अनुमति लिई अनुसन्धान गरिरहेको छ ।