एजेन्सी । फिफा विश्वकप कतार २०२२ अन्तर्गत क्वाटरफाइनलमा क्रोएसियासँग पेनाल्टी सुटआउटमा हारेपछि ब्राजिलका प्रशिक्षक टिटेले पद छाड्ने घोषणा गरेका छन् ।

प्रतियोगिता सुरु हुनुअघि नै प्रशिक्षकले जस्तोसुकै नतिजा आएपनि आफू जिम्मेवारीमा नरहने बताएका थिए । ६१ वर्षीय प्रशिक्षक टिटेले पछिल्लो ६ वर्षदेखि राष्ट्रिय टोलीको जिम्मेवारी सम्हालिरहेका थिए । उनले सन् २०१९ मा कोपा अमेरिका उपाधि दिलाएपनि विश्वकपमा क्वाटरफाइनल चरणमा टिमलाई पार गराउन सकेनन ।

‘यो निकै कठिन निर्णय हो,’ क्रोएसियाविरुद्ध हारपछि टिटेले भने, ‘एउटा यात्रा सकिएको छ । मैले डेढ वर्ष अघिदेखि यो जानकारी दिएको थिएँ । मलाई पूर्ण यात्रा गर्नु थियो र यसक्रममा थुप्रै अविस्मरणीय क्षण पनि रहे ।’

टिटेको प्रशिक्षणमा ब्राजिलले ८१ खेल खेल्दा ६१ जित हासिल गरेको थियो । १३ खेल बराबर हुँदा ७ खेलमा भने टोली पराजित भयो ।